لوئ والا تارہ

پہاڑی افسانہ

پوڈ کاسٹ

افسانہ نگار کی اپنی آواز میں پہاڑی افسانہ '' لوئی والا تارہ '' سننے کے لیے سامنے دئے گئے امیج پر کلِک کریں۔

جہیڑیاں سِجی نیاں لکڑیاں دیغر ی ویلے چلّہے کول رکھنوئیاں ِسیاں اوہ بلی تح ختم ہوئ گئیاں۔ کہرح نے سارے لوک اپنی ایں اپنی ایں کھٹیں ر چڑی اے ۔ چلھے اگے پئ نی سِرگٹیں نی ڈبی اے دسنی کے ابے ہور یں ناں آخری سِرگٹ وی مکی آ ، تح ہن تھوڑِیا دیرِیا بعد اِنہیں ناں گھراٹ چلنا شروع ہوئ ایسی۔

ما ء کدح اندر گینی کدح باہر ، اینیاں لگناں کے کیِہہ گنویا ناں دَیس۔ بڑی کڑی اجے نی ستی ، کح پتا کہڑییں سوچیں وچ سی کے کِسح چیزا نا ں کھٹکار بجھی تح اٹھی بیجی گئی ۔ ماؤ جاغنیا دیکھی تح بولی ”ماٹی تس ہالے جاغنیا؟ “ ما ء جانوائ اینی تح بولی ” کڑیے، ماڑا پپؤ پوری تیاڑی تاپح وِچ ڈبا ناں سا ۔ ڈاکٹرح جہیڑی دوائ دیتی نی اوہ چوویں گھنٹیاں وچ چار دفع دینی تح تاں تاپ ہٹسی۔ تر ہہ دفہ تیاڑیا دیتی نی دِ سیوس۔میں وی سئ گچھاں تح ایس نی چوتھی دوائ کھنجی اےسی۔

ابا ادھ ستیا آوازا وِچ بولیا۔ " کح کر کر لائ نیآ ۔ ستے نے جاغائ تح دوائ کسیا دینیس۔ پھدری اٹھی دئ شوڑیانسں۔ “

ماء بولی ۔ چپ کر کڑیے ، پیو نی نیندر ناں خراو کر “۔

کہڑی ایک اور لنگھتھی تح ما اٹھی باہر گئ۔ دلہ وچ سوچنی ، گھرہ دوار ایک کہڑی تح اس ناں وی سیل مکیا ناں۔ پتہ نیں ٹیم کح ہوسی ۔

ماڑے پپو نیا ں دوا ی آ ناں ٹیم ناں کھنجی گھچھح ۔ باہر نکلی دیکھاں ، متے لوی والا تارہ نختا ناں ویہ تح کیہ پتہ لغے۔ باہر گھپ انیارا۔

ما مڑی اچھی تح پترہ نے متھے اپر ہتھ رکھنی ۔کول رکھی نی دوائ ہتھہ وچ پوڑی تہح سوچیں وچ پئ اینی۔

اس تاپے مہوٹیا لغے اج یہہ چڑھنا سا؟ کل مہاڑے پپو ناں نویں سکولہ وچ پہلا تیاڑا دا ۔ اللہ کریہ پھدری تک یو تاپ اولہی گچھے۔

جہیڑے تیاڑے ناں گرایں وچ نواں سکول بنتا ناں ، سارے لوکیں ، ہیک اہ گل پوڑی نی ، نواں سکول بوں چنگا دا ۔ ماشٹرانیاں باہرا پڑھی تہ آءیاں نیاں۔ مہاڑا پپو وی نویں سکولہ وچ گچھہ تہ متے چنگے نمبریں اینی ایسی۔ پہاٹے نی نوں تح آخنی ، اس پچھیں کسیا لغی نی ایں۔ ایہہ نہے پڑھنا شڑنا۔ اس کسے کول رکھای تح کم سکھا تہ کل کسے کمای آ جوغا ہوسئ۔ مہاڑے اللہ مہاڑا ساتھ دتا تح مہاڑا پپو ڈاکٹر بن سی۔ میں انہیں مسکانے لوکیں نییں گلیں وچ اچھی تہہ اپنے پتر ح مزدوری کیاں لاں؟ اس گرایں ناں پہلا ڈاکٹر مہاڑا پپو ہوسی۔

ما ٫ اجے سوچنی ہے سی کے بڑیا مسیتی وچ اذان شروع ہو ی ایہی۔ ٹیم لغنیاں کہیہ پتا نیں لغناں۔

یو ماؤ و نی دعا سی یا پپو نی تیاڑیا راتی نی محنت۔۔۔۔۔۔۔۔ پپو ناں میٹرک ناں رزلٹ آیا تح سارے گرائیں نے لوکیں مٹھیائ کھادی۔

مہاڑے پپو سکول ٹاپ کیتا ۔۔۔ تح میں مٹھیاینیاں کیاں ناں بنڈاں۔ محلے نییں کڑییں کنے یو گل بانیاں ، پپو نیاں ماؤ پانِییں ناں گڈوا سرح اپر ایہاں لغے جیہاں پھلیں نی ٹوکری کسے اس نے سریح اپر رکھی نی ۔

دسویں ناں امتحان پاس ہوۓ نی خوشی ہلے ختم نیسی ہوی نی کے ماؤ نے دل اہ وچ ہیک ہوکا جیا اٹھیا۔ ' مہاڑا پپو ہن کالجے وچ گیسی ، تح اس نی پڑھای ہو ر مشکل ہوی ایسی۔ اس ناں پیو تح ماڑیا طرحے الفے کلا آخناں۔ اس کن دیکھسی کے ایہ کیہ پڑھناں کیہ پڑھنا وی دا کے نئیں؟ کیاں ناں میں کل گچحی تح مولوی ہوریں کنیں گل کراں۔ اونے ناں بڑا پتر ماشٹر دا ۔ متے کوئ عقلہح نی گل دسین۔

یارویں تح بارویں وچ پپو ۔۔۔۔۔ سکول اہ وچ گھٹ تح مولوی ہوریں نیں گھر گچھی زیادہ پڑھای کرنا ریا۔

تح جدوں پپو ایبٹ آباد ڈاکٹری پڑھیا گیا تح مولوی ہوریں سارے گرایں نی دعوت کیتی ۔ لوکیں کنے ایہ گل مولوی ہوریں کتنی واری بای کہ انہیں آپے وی ناں یاد ہوسی۔ " تس مہاڑی گل یاد رکھیا ۔ مکھوٹی آ ناں پتر ڈاکٹر بنی تح صرف مہاڑا علاج یہ ناں کرسی بلکہ تسیں ساریاں اس کولا فایدہ ہوسی۔ مولوی ہور خوشیا کنے اپنا سر اوریہ پریہ کیتا تاکہ سارے لوک انہیں نی گل بجھین تح انہیں نی پگڑی اہیہ کھلی گیی۔

ٹیم لنگنیاں پتہ وی نیں چلناں۔۔۔۔۔۔۔۔۔۔ ما اج الماری کھولی تح پپو نے سردیں نے کپڑیا ں دھپ لانی تح کنے سوچنی ۔

مہا ڑے پپو ناں پہلا سال ڈاکٹری پڑھنیاں کوعیاں لنگتھا ، کیہ پتہ ہے نی چلیا ۔ اللہ کرسی اگرلے سال وی اسیہ طرح لنگی اے لے تح میں وی لوک ڈاکٹرہ نی ما آخلے۔

ٹیم تھوڑا ہور اگے لنگتھاہ ناں۔ ماؤ اج ستیں سویلیں سکیاں نی لکڑیئاں چولھے کول آنی رکھیاں تح پپو ناں ابا بولیا '' خیر تح دی ناں ؟ ساریاں اجے بالنیں؟ ''

ما ؤ نییں اکھیں وچ چمک صاف ندری اینی ، منڈی زور کنیں ہلای تح جواب دینی ۔ '' خیر یہ دی ۔۔۔۔۔ اج تس بزارہہچ سیا تح مہاڑے پپو ناں ٹیلی فون آ یا سا۔ آخے ماٹی تسیں کیا ہیک چنگی خبر دی۔ تح میں آخیس ، ما، صدقح ، جلدی دس ۔۔۔ کح گل دی"

تح مڑئ میں آخنا ساڑے کالجہ وچ اج ہڑتال ہوئ گئ تہ میں اج تریں چاں تیاڑیاں کیا گھر ایساں۔ کیہ پتہ راتی کیہڑے ویلے پوچسی ۔ ٹھڈا وا ناں ہوسی، سکی نی لکڑی چلھے کول آئ نی وے تح بالنیاں کہیڑا ٹیم لغناں۔

پپو ناں ابا اٹھی بجی گیا ۔ خوشیا کنے پھولی تح پچھنا ، ۔۔۔۔۔۔۔ " ایہ گل توں ہن توڑی چھوائ نی کیاں سی " ۔

ایہ لکڑیئاں چیرے جؤغیاں ناں ہونیاں تح میں پپو نے اچھے تک تسیں کولا چھوای ہے رکھاں وا۔ ہن اٹھی تح انہیں ناں کیہ کری دیا۔

جہیڑیاں کلہہ نِیاں سِجی نِیاں لکڑیاں سِیاں اوہ تح کدوں نیاں بلی مکی گیئاں۔ ہن ما٫ ہیک ہیک کری تح سکی نی آں وی چولھے وچ باہنی ، کدح چنغیری ناں کپڑا چھنڈنی ، تح کدح کنیاں وچ چمچا مارنی۔ کہرح نے سارے لوک اپنی ایں اپنی ایں کھٹیں اپر پوچی اے۔ چلھے اگے پئی نی سرگٹیں نی ڈبی ایہ دسنی کہ ابے ہوریں ناں آخری سرگٹ وی مکی آ ۔ تح ہن تھوڑیا دیریا بعد انہیں ناں گھراٹ چلنا شروع ہوی ایہسی۔

ما٫ کدح اندر گینی کدح باہر، دماغیچ بوں سارے بِسوِیسے اینے دِینس۔ آ خیا تح میں تھیا سا اس کی کے ٹارچا وچ نویں سیل بای تح اچھیاں، کہہ پتہ پؤلھہی ناں گیا وح۔ کالیاں راتیں پیعیاں نیِاں تح رستے وِچ انیارا بوں ہو سیس ۔ ما، الھے ہور پتہ نیں کح کح سو چاں کرح وا کہ پپو نے ابے نی آواز آی '' بدلیں کنیں شڑکاں ساریاں کاھلیں بنتی نی آن۔ میں تح لغناں ہن اوہ کتح پھدری ہے پوچسئ۔ تو وی ہن یو مہوٹیاں ہسا، تح سئ ہو ۔ ''

ما، پریشان ہوئ تح فیر باہر نکلی اینیں۔ کح پتہ مہاڑے پپو نی ٹارچ بلنیں کے نئیں ؟ چن تح کتے چرکا چڑھسی، لوی والا تارہ وی کتے نئیں ندری ایناں۔ گھپ انیارے کولا ڈری تح ما، مڑی اندر اینی اوٹھی۔ تح تسویح پوڑی مصلے اپر بیجی اینی ۔ پپو نیاں ٹارچا نی لو بوے اپر بعد وچ پئ تح ماؤ پترہ نی خشوو پہلے آئ اٹھی۔

پپو ناں آخیرلا سال بوں اوخا سا ۔ پوریا سالا وچ ہیک ے واری گھر آیا ۔۔۔۔۔۔ ہور اوہ وی کتاویں ناں بکسا کنے ہینی تح ۔ جتنے تیاڑے گھر ریا ما ، براور ڈیوٹی دینی رہی۔ راتی چائ ناں تھرموس پہری پپو کول رکھیا ناں ہونا سا ۔ فیر وی اٹھی اٹھی دیکھنی چاہ ٹھڈی تح نیوس ہوی گئ۔

پپو جدوں ڈاکٹر بنی آیا تح ما ، ایہیاں ہوئ نی انیا کچہ نی بنتی نیں۔ نکییں نکییں گلیں اپر روے پئ اینی ۔ کدح ہسنیاں رونیں ، تح کدح رونیاں ہسنیں۔ پپو وی نکا بچہ بنتا ناں۔ کدح فرمیش کرناں ، ماٹی چا، لبھی ایسی ؟ کدح آخناں ، بڑی مدت ہوی ائ پراٹھا نی کھادا۔

ہیک تیاڑح آخنا '' ما،ٹی میں لہور گچھی تسیں نیں چا، بوہت یاد ایسی ''۔ ما، بولی '' مہاڑیا پترا لہور کہح رکھیا ناں دے ؟ '' تو ڈاکٹر بنی گھر آیا دیں اٹھی ہن۔

ماے ڈاکٹر بنیں تہح گرائیں وِچ کؤن رہنے دیسی ؟ جہیڑے ناویں ناویں ڈاکٹر ہونے انہیں ہاوس جاب کرنی ہونیں۔ اس واسطے مہاڑا لہور نے ہیک ہسمتالہح وِچ بندووست وا ناں۔

'' مہاڑی بلا جانہح ۔۔۔ ہوس جاو کہح ہونیں ۔ توں بہل کریاں، عیدی اپر جلدی گھرہح مڑی اچھے نی گل انہیں کنے پہلیں ہے کری شوڑیاں۔ عیدی ناں جوڑا تواڑا پیو کل یہہ درزیح دئ آیا سا ا ٹھی۔ '' ٹھیک دا ماٹی '' ۔ یو گل بانیاں پپو ماؤ لہح نیں دیکھیا ۔ کیاں کے اس پتا سا ایہ گل اس دلا ہوی تہح بای نی نئیں ۔ تح جہیڑی گل دلہہ اپر ہور تح مونھیں اپر ہور وہح او ما ، سمجھی اینی۔ پپو گٖڈی آر چڑھیا تہح ما ، پتر دوے روہح لغے نے سے۔

پپو نی ہاوس جاب تہح ختم ہوے نیں مہینا ہوی آ ۔ اوس توں بعد اس ناں صرف ہیک ٹیلی فون آیا کے ۔ مہاڑی ہاوس جاب تہح ختم ہوئ گئ ، پکی ڈاکٹری شروی ہوی گیے تہح میں لہورہح کولا وی ہور اگے کسہح نکے جے ہسمتالیچ ڈیوٹی کرنا دیس ۔

ما، اپنے ڈلکے نے اتھرو روکی تہح بولی '' پترا مولوی ہوریں ناں سنہیا دا تو کیا کے ۔ ایتھیں گرایں وِچ آنی تہح ہسمتال کھول۔ میں چندہ کری تہح تو کیا تر ہیہ دوکاناں کراۓ اپر رکھی نی آں۔ ''

''مہاٹی مولوی ہوریں مہاڑا سلام دیا تہح آخیا نیں دوکاناں مڑی دی شوڑین ، میں جدوں ایساں تہح آپی گل کرساں انہیں کنیں۔ ''

پپو ناں تبادلہ لہور وا تہح ماؤ پیو دویں لہور دیکھیا۔ اوہ تہح آخنا ریا کے ساریاں بھرنیں پرارہریں اینی آچھیا ۔ مغر ۔ ابے منع کری شوڑیا کے ایہنیں ساریاں کنے رکھی تہح اتنے بڑے کرایے خرچے اوہ کدرا پورے کرسی ، دووا گھریہہ تالے تہہ نیں لانیں؟

جدوکنی ما، لہورا ہوی آی نیں۔۔۔ تیاڑی تے کمے کاجہ وِچ پولھی نی ہونیں ، مغر رات پینی تہح ڈونغییں سوچیں وچ پئ گینی۔

ہیک دل کرناں کے سارا کیہ چھوڑی تہح کرہح آ ۔۔ ایتھیا آنی نکی موٹی ڈاکٹری کرنا ہویاں۔ گرایئں نے لوک توں پیسے بوں تہح نیں دینے لغے ، اسیں کول تہح ہونا ناں۔ فیر ساڑی وی دوایی دارو کرنا ہویاں۔ مولوی ہور وی رسے نیں کے پپو اپنے لوکیں نی خدمت کیاں نیں کرنے چاہناں۔

دووا دل اہیہ کرناں کے ماڑا پپو ایتھیں رہی تہح کتنے ہیک پیسے کماسی ۔ تیاڑی رات کجیے کریہہ تہح میں اوہ ٹیم لنگایا کے مہاڑا پپو کسے طرہح ڈاکٹر بنی گچھہح۔ مہاڑے نصیوہح وِچ وی کوئ سخہح نی کہڑی ایسی۔ اییہے سوچاں اینی تہح ما ، باہر نکلی اینی ۔ باہر راتی ناں پتہ نیں کہیڑا پہر ہونا ۔ لوئ والا تارہ اج وی نیں ندری اینا ۔ باہر گھپ انیارا دیکھی تہح ما مڑی اندر اینی اٹھی۔ اند ر آنی اگ گلورنے لغنی۔

پیو ایہہ پتا کے گھپ انیارا باہر وی دا تہح اندر وی۔ کھنگو ناں پہاناں کری تہح اٹھی بیجناں تہح تھکے ہارے نے لہجے وِچ گھرہح والیا لے مڑی آخنا '' ہسی نی ایں اگیں کِسیا گلورنی ایں ؟ تواڑا مہاڑا لوی والا تارہ ہن ڈبیا ناں "۔